|
На імпрэзу «Пад вернай зоркай Венерай», на якой падводзілі вынікі абласнога паэтычнага конкурсу «Зорка Венера», сабралося шмат аматараў творчасці класіка беларускай літаратуры М. Багдановіча. Школьнікі, студэнты, людзі сталага ўзросту і проста захопленыя творчасцю паэта і паэзіяй у цэлым. Культурная праграма вечарыны была прыемнай на ўспрыманне і даволі насычанай па сваёй структуры. Актыўны ўдзел прынялі вучні дзявятага класа сярэдняй школы № 41, якія чыталі вершы паэта, спявалі песні.
На вечары прысутнічалі артысткі НАДТ імя Якуба Коласа Н. Аладка і С. Жукоўская, якія колькі слоў сказалі пра паэта, а пасля праспявалі мілагучную песню пад гітару. Была праведзена віртуальная экскурсія па тых месцах, з якімі быў звязаны цяжкі лёс маладога Максіма Багдановіча. Цішыня, якая стаяла на пачатку мерапрыемства, напоўнілася жывымі словамі паэта на роднай матчынай мове.
А потым узнагародзілі пераможцаў дзясятага абласнога паэтычнага конкурсу «Зорка Венера», які праходзіў ў гонар 120-годдзя паэта. Конкурс выявіў мноства маладых талентаў, якія паказалі свае здольнасці як у паэзіі, так і ў прозе. Па правілах ўдзел у ім маглі прымаць таленты з Віцебскай вобласці, але былі маладыя паэты і празаікі з Міншчыны і Гродзеншчыны. Арганізатары конкурсу вырашылі вызначыць прызавыя месцы па трох узроставых катэгорыях: 7-14 гадоў, 15-18 гадоў і ўдзельнікі да 25 гадоў.
Творы разглядала журы: старшыня Віцебскага аддзялення Саюза пісьменнікаў Беларусі Т. Краснова-Гусачэнка, члены СПБ В. Русілка, Б. Беляжэнка, М. Намеснікаў, А. Крыклівец. Вынікі былі падведзены, і самыя таленавітыя атрымалі ганаровыя граматы і падарункі. Сярод пераможцаў і нашыя студэнты. Дыпломамі І і II ступені адзначаны адпаведна творы студэнтак ФБФК М. Каснікоўскай і Т. Лівіцкай. Вылучыўся ў конкурсе і гістарычны факультэт нашага ўніверсітэта: студэнтка чацвёртага курса Настасся Пашута заняла трэцяе месца.
Мы шчыра віншуем пераможцаў і зычым творчых поспехаў!
Зміцер Шыловіч,
студэнт 3 курса ГФ. |
